Update
GEORGE NUUS - Wanneer die natuur verwoesting saai, is dit dikwels die kwesbaarste gemeenskappe wat die swaarste getref word. Vir baie inwoners van informele nedersettings het die onlangse windstorm, reën en vloede verwoestende gevolge gehad. Sonder die ondersteuning van versekering of ander hulpbronne moet hulle nou hul huise herbou met wat tot hul beskikking is.
George Herald het Vrydagoggend ná die wolkbreuk in Blanco by inwoners in Riverlea, 'n informele nedersetting net duskant die brug tussen Heatherpark en Blanco, gaan inloer.
Asof die windstorm van die vorige week nie reeds genoeg skade aangerig het nie, moes inwoners Donderdagmiddag ook 'n intense wolkbreuk beleef.
Sowat 30 mm reën het binne 15 minute uitgesak - 'n verskynsel wat as 'n wolkbreuk of lugstorting geklassifiseer word.
Hoewel die vloedwater, in die spesifieke deel van Riverlea, relatief min skade veroorsaak het omdat die water teen die heuwel na die Malgasrivier kon afvloei, dra baie inwoners steeds die letsels van die vorige week se windskade.
Vir Mervin Ruiters en Denvor Lewen-dal, wat besig is om hul beskadigde huise en die gemeenskap se kerk te herbou, is die grootste bron van kommer 'n enorme bloekomboom in die middel van die nedersetting.
Die groot bloekomboom wat in die middel van die informele nedersetting staan, veroorsaak angs en onsekerheid onder inwoners wanneer sterk winde waai. Foto: Marguerite van Ginkel
Volgens die inwoners kraak die boom en leef hulle in vrees dat dit die volgende groot boom kan wees wat val. Hulle sê versoeke aan die munisipaliteit om die boom te verwyder is afgekeur omdat dit op privaat eiendom staan, terwyl hulle nie die geld het om dit self te laat afsaag nie.
Die gebou wat as gemeenskapsaal en kerk vir inwoners van die informele nedersetting in Riverlea gedien het, is tydens die onlangse windstorm verwoes. Foto: Marguerite van Ginkel
Intussen het die wolkbreuk groot dele van Blanco Donderdagaand onder water gelaat, met strate en die brug tussen Blanco en Heatherpark wat oorstroom het. Volgens die George-munisipaliteit is die situasie waarskynlik vererger deur versperrings in die stormwaterstelsel wat deur stormrommel en onwettige storting veroorsaak is.
Previous articles:
‘Ons bring jou die nuutste Tuinroete, Hessequa, Karoo nuus’
